जनता आवास कार्यक्रम मार्फत प्यूठानमा ११० घर बन्दै

सागर रिजाल
१ पुस २०७६, प्यूठान ।
प्रदेश सरकारले प्यूठानमा जनता आवास कार्यक्रम सञ्चालन गर्दै छ । कार्यक्रम मार्फत जिल्लाका विपन्न वर्गका लागि विभिन्न बस्तीमा एक सय १० घर निर्माण हुने छन् । यस आर्थिक वर्षमा जिल्लाको क्षेत्र नम्बर १ र २ मा ५५÷५५ वटा घर निर्माण हुने प्रदेश सभा सदस्य (सांसद) हरिप्रसाद रिजालले जानकारी दिनुभयो । दलित, जनजाति, विपन्न र पिछडियाका वर्गको लागि जनता आवास कार्यक्रम मार्फत घर निर्माण हुने सांसद उहाँले बताउनुभयो ।
प्रति घर तीन लाख ३० हजार बजेट
प्रदेश सरकारले प्रति घर निर्माणका लागि प्रतिघर तीन लाख ३० हजारका दर बजेट विनियोजन गरेको छ । २० प्रतिशत स्वयं व्यक्तिले श्रमदान गर्नेछन् । दुई कोठा, ट्वाईलेट, ब्रण्डा सहित सहितको घर बन्नेछन् । विपन्न परिवारको व्यक्तिगत जग्गा भएमा उनीकै जग्गामा र नभएमा पालिकास्तरबाट त्यसको व्यवस्थापन गरि घर निर्माण हुनेछन् ।
जनता आवास मार्फत अब बन्ने घर चालु आर्थिक वर्षको असारसम्म निर्माण सम्पन्न हुनेछन् । पालिकाहरुको निर्णय र प्राविधिकले अनुगमन गरेपछि घर निर्माणको कार्य सुरुवात गरिनेछ । घर निर्माणको आवश्यकता पहिचान गरि आगामी वर्ष यसलाई थप विस्तार गरिनेछ सांसद रिजालले बताउनुभयो ।
जिल्लाका यी क्षेत्रमा निर्माण हुदैछन् घर
प्यूठान क्षेत्र नं १ अन्र्तगत प्यूठान नगरपालिका–३ विजयनगरको दलित ब्स्तिमा ११, स्वर्गद्धारी नगरपालिका–८ चाल्नेटारको १२ दलित परिवार, ऐरावती गाउँपालिका–१ दाङवाङको खल्नेटामा १४ वटा, सरुमारानी गाउँपालिका–१, २, ३ र ४ मा १८ वटा नयाँ घर निर्माण हुने भएका छन् ।
यसैगरी क्षेत्र नम्बर २ अन्र्तगत गौमुखी गाउँपालिका–४ पुँजामा १५ वटा, गौमुखी गाउँपालिका–६ लिवाङमा ७ वटा, झिमरुक गाउँपालिका–७ मा १५, प्यूठान नगरपालिका–८ मा १३ घर निर्माण गर्न निर्णय भएको छ । यस्तै प्यूठान नगरपालिका–७ मा ५ वटा लक्षित वर्गको लागि नयाँ घर निर्माण हुने भएको हो ।
अगिल्लो वर्ष २६ घर लक्षित वर्गलाई हस्तान्तरण
गत वर्ष प्रदेश सरकारको बजेट मार्फत जिल्लामा २६ नयाँ घर निमार्ण भएका थिए । निर्माण गरिएका घरहरु लक्षित वर्गलाई हस्तान्तरण गरिसकेको प्रदेश सभा सदस्य रिजालले जानकारी दिनुभयो । गत वर्ष जिल्लाको सरुमारानी गाउँपालिकामा अन्र्तगतका बस्तिमा १८ र नौवहिनी गाउँपालिका–५ मा ८ वटा घर निमार्ण भएका थिए ।